नाशिक (इंडिया दर्पण वृत्तसेवा) – सिडकोतील राणाप्रताप चौकात वृध्द महिलेच्या गळयातील सोनसाखळी दुचाकीस्वार भामट्यांनी ओरबाडून नेल्याची घटना घडली. शिकवणीला गेलेल्या नातीस सोबत घेवून घराकडे या वृध्दा जात असतांना चोरट्यांनी ही चोरी केली.
संध्या केशवराव पवार (रा.राणाप्रताप चौक,सिडको) यांनी याप्रकरणी तक्रार दाखल केली आहे. पवार या बुधवारी (दि.३०) शिकवणीसाठी औदुंबर स्टॉप भागात गेलेल्या नातीस घेण्यासाठी गेल्या असता ही घटना घडली. लहानग्या नातीस सोबत घेवून सारस्वत बँक समोरून त्या आपल्या घराच्या दिशेने पायी जात असतांना पाठीमागून आलेल्या दुचाकीस्वार भामट्यांनी त्यांच्या गळय़ातील सुमारे ५५ हजार रूपये किमतीची सोनसाखळी ओरबाडून नेली. याप्रकरणी अंबड पोलिस ठाण्यात जबरीचोरीचा गुन्हा दाखल करण्यात आला आहे. अधिक तपास उपनिरीक्षक पवार करीत आहेत.
…..
