नाशिक (इंडिया दर्पण वृत्तसेवा) – वृंदावननगर भागात खुन्नसने का बघतो या कारणातून तरूणावर धारदार शस्त्राने वार करण्यात आल्याची घटना घडली. या घटनेत तरूण जखमी झाला आहे. या मारहाण प्रकरणी अरूण विठ्ठल पांजगे (२६ रा.ज्ञानेश्वर सोसा.कोनार्क नगर) या युवकाने तक्रार दाखल केली असून आडगाव पोलिस ठाण्यात दोघांविरूध्द गुन्हा दाखल करण्यात आला आहे. निलेश राजगुरू आणि बंटी कोळी अशी तरूणावर धारदार शस्त्राने हल्ला करणा-या संशयितांची नावे आहेत. पांजगे आणि मुकेश माळोदे हे दोन्ही मित्र सोमवारी (दि.७) रात्री दहा वाजेच्या सुमारास वृदावननगर येथील देवेश फोटो स्टुडिओ भागात गप्पा मारत उभे असतांना ही घटना घडली. परिचीत असलेल्या संशयितांनी दोघा मित्रांना गाठले. यावेळी राजगुरू याने माझ्या कडे काय खुन्नसने बघतो या कारणातून पांजगे यास शिवीगाळ करीत त्याच्या कमरेवर धारदार शस्त्राने वार केला. या घटनेत पांजगे जखमी झाला असून अधिक तपास हवालदार डापसे करीत आहेत.