नाशिक (इंडिया दर्पण वृत्तसेवा) – औरंगाबाद रोडवरील ओढा येथे भरधाव छोटा हत्ती मालवाहू टेम्पोने दिलेल्या धडकेत ६० वर्षीय वृध्दा ठार झाल्याची घटना घडली आहे. बनूबाई नामदेव जाधव (रा.ओढा ता.जि.नाशिक)असे मृत वृध्देचे नाव आहे. याप्रकरणी परप्रांतीय टेम्पो चालकाविरूध्द आडगाव पोलिस ठाण्यात अपघाताचा गुन्हा दाखल करण्यात आला आहे. जाधव या मंगळवारी ओढा गाव चौफुलीवर रस्ता ओलांडत असतांना हा अपघात झाला होता. औरंगाबाद रोडने भरधाव जाणा-या एमएच १२ जेएफ ५३३९ या छोटा हत्ती टेम्पोने पायी जाणा-या बनूबाई जाधव यांना जोरदार धडक दिली होती. या अपघातात त्या गंभीर जखमी झाल्याने त्यांचा मृत्यू झाला. या प्रकरणी मुलगी इश्वरी नवले यांनी दिलेल्या तक्रारीवरून आडगाव पोलिस ठाण्यात टेम्पो चालक अजरूद्दीन कासीमम बान (मुळ रा.गोरखपूर,उत्तरप्रदेशा हल्ली माडसांगवी)याच्याविरूध्द अपघाताची नोंद करण्यात आली आहे. अधिक तपास हवालदार गांगुर्डे करीत आहेत.