नाशिक (इंडिया दर्पण वृत्तसेवा) -भद्रकालीत अल्पवयीन मुलींचा विनयभंग केल्याप्रकरणी एकास पोलिसांनी गजाआड केले आहे. हाफीज उल्ला खान (३४ रा.नानावली) असे अटक करण्यात आलेल्या संशयिताचे नाव आहे. याप्रकरणी भद्रकाली पोलिस ठाण्यात गुन्हा दाखल करण्यात आला आहे. या घटनेत पीडितांचे वडिल व मामे भाऊ जाब विचारण्यासाठी गेले असता संशयितांने त्यांना शिवीगाळ करीत मारहाण केली आहे. पोलिसांनी दिलेल्या माहितीनुसार परिसरातील १४ वर्षीय पिडीत मुलगी सोमवारी (दि.२६) आपल्या मामाच्या मुलीस सोबत घेवून नानावली दर्गा भागात भाजीपाला खरेदी करण्यासाठी गेली होती. भाजीपाला खरेदी करून दोघी एका किराणा दुकानात खरेदीसाठी गेल्या असता ही घटना घडली. दुकानात पाठीमागून आलेल्या घराशेजारील संशयिताने दोघींना धक्का मारून विनयभंग केला. मुलींनी घरी जावून आपल्या पालकांकडे आपबिती कथन केल्याने पीडितेचे वडिल व मामेभाऊ जाब विचारण्यासाठी संशयिताच्या घरी गेले असता त्याने दोघांना शिवीगाळ करीत मामाच्या मुलास लाथाबुक्यांनी मारहाण करून त्याचे कपडे फाडले. याबाबत विनयभंग आणि बाल लैंगिक अत्याचार संरक्षण अधिनियम (पोक्सो) कायद्यान्वये गुन्हा दाखल करण्यत आला असून संशयितास अटक करण्यात आली आहे. अधिक तपास सहाय्यक निरीक्षक बिडगर करीत आहेत.