नाशिक (इंडिया दर्पण वृत्तसेवा) – चेहडीरोडवरील गिते मळा भागात बिल्डरने गावगुंडाच्या मदतीने कुटुंबियास बेदम मारहाण करीत राहत्या घरावर जेसीबी फिरवला तर संतप्त घरातील सदस्यांनी जेसीबीवर दगडफेक करीत चालकास चोप दिल्याची घटना घडली आहे. याप्रकरणी नाशिकरोड पोलिस ठाण्यात परस्परविरोधी गुन्हा दाखल करण्यात आला आहे. या घटनेत तक्रारदारासह जेसीबी चालकाचे दात पाडण्यात आले आहे.
मनोहर पोपटराव गिते (६१ रा.गिते मळा,रेल्वे मालधक्काजवळ) यांनी याप्रकरणी तक्रार दाखल केली आहे. गिते बंधूनी वडिलोपार्जीत जमिनीवरील हक्कासाठी न्यायालयात दाद मागितली होती. मात्र अन्य भावंडानी बांधकाम व्यावसायिकाकडून भरपाई घेत वस्ती सोडली. न्यायालयीन आदेशानुसार मालकी व्यावसायिकाला मिळाली, परंतू गिते यांनी उच्च न्यायालयात याचिका दाखल करायचे म्हणत जागा खाली केलीच नाही. म्हणून, बिल्डकॉन कंपनीच्या ठेकेदाराने मंगळवारी (दि.२३) पहाटे थेट जेसीबी संबंधिताच्या घरावर चालवल्याचा आरोप गिते यांनी केला आहे. गिते कुटुंबिय पहाटेच्या साखर झोपेत असतांना आठ ते दहा जणांचे टोळके घरात घुसले. या टोळक्याने कुटुंबियांना घराबाहेर काढत घरातील सामान अस्ताव्यस्त फेकले. मनोहर गिते यांनी विरोध करण्याचा प्रयत्न केला असता विनोद गांगुर्डे नामक गावगुंडाने त्यांच्या हात पकडून तोंडावर बुक्का मारला. या घटनेत गिते यांचे दोन दात पडले. त्यामुळे पुतण्या मदतीला धावून आला असता त्यासही संशयिताने शिवीगाळ करीत लाथाबुक्यांनी मारहाण केली. गावगुंडाकरवी होणारी कारवाई थांबविण्यासाठी गिते यांनी घराबाहेर उभ्या असलेल्या बिल्डर संदिप ठाकूर आणि अमरसिंग पाटील यांच्याकडे धाव घेतली असता त्यांनी जेसीबीद्वारे घर पाडण्याचे चालकास सांगून घराचे नुकसान केल्याचे म्हटले आहे. तर विशाल भगवान पास्ते (रा.रेल्वे ट्रॅक्शन,संभाजीनगर एकलहरारोड) या जेसीबी चालकाने म्हटले आहे की, बिल्डर अमरसिंग पाटील यांच्या सांगण्यावरून मंगळवारी पहाटेच्या सुमारास जेसीबीच्या सहाय्याने घर पाडले असता घरातील चार ते पाच लोकांनी थांबवून लाथाबुक्यांनी मारहाण केली. तसेच एकाने तोंडावर बुक्का मारल्याने दोन दात पडले असून या घटनेत जेसीबीच्या काचा फोडून नुकसान करण्यात आल्याचे पास्ते याने आपल्या तक्रारीत म्हटले आहे. याप्रकरणी नाशिकरोड पोलिस ठाण्यात परस्परविरोधी गुन्हा दाखल करण्यात आला असून अधिक तपास सहाय्यक निरीक्षक शेळके आणि उपनिरीक्षक शिंदे करीत आहेत.
