नाशिक : अमृतधाम भागातून सव्वा दोन लाख रूपये किमतीची सुगंधी सुपारी,तंबाखू आणि गुटखा हस्तगत केला आहे. गुटख्याची वाहतूक होत असल्याची माहिती अन्न व औषध प्रशासनाने कळाल्यानंतर त्यांनी ही कारवाई केली. या कारवाईत चालक जितेंद्र रघुनाथ नेरपगार (४२ रा.बिडीकामगारनगर) याला गजाआड करत पथकाने अ‍ॅपेरिक्षा जप्त केली आहे. याप्रकरणी आडगाव पोलिस ठाण्यात गुन्हा दाखल करण्यात आला आहे. याप्रकरणी अन्न व सुरक्षा अधिकारी दिनेश ज्ञानेश्वर तांबोळी यांनी तक्रार दाखल केली आहे. अमृतधाम भागात मोठ्याप्रमाणात गुटख्याचा साठा असून त्याचे अ‍ॅपेरिक्षातून वितरण केले जात असल्याची माहिती एफडीएला मिळाली होती. या माहितीच्या आधारे बिडीकामगारनगर भागात पथकाने सापळा लावला असता संशयित मुद्देमालासह जाळयात अडकला. एमएच १५ इव्ही ५७५३ या अ‍ॅपेरिक्षाच्या वाहन तपासणीत राज्यात विक्री,निर्मीती आणि साठवणुकीसाठी बंदी असलेला वेगवेगळ्ळया कंपनीची सुगंधी सुपारी, तंबाखू आणि गुटखा असा सुमारे २ लाख १३ हजार ३२१ रूपये किमतीचा मुद्देमाल मिळून आला. अधिक तपास सहाय्यक निरीक्षक तोडकर करीत आहेत.
