नांदगाव (इंडिया दर्पण वृत्तसेवा) – नांदगाव – चाळीसगाव रस्त्यावर पिंपळखेड टोल नाका जवळ कार आणि दुचाकीच्या झालेल्या भीषण अपघातात पती- पत्नीचा जागीच मृत्यू झाला. या घटनेत तीन जण गंभीर जखमी झाले आहे. जखमींना ग्रामीण रुग्णालयात दाखल करण्यात आले आहे.
या अपघातात भाऊसाहेब माळी व लंकाबाई माळी, रा, नाग्या- साक्या या पती – पत्नीचा मृत्यू झाला. हा अपघात इतका भीषण होता की अपघातानंतर दोन्ही वाहने रस्त्याच्या बाजुला असलेल्या नाल्यात फेकली गेली. या अपघातात कारमधील प्रवासी सुध्दा गंभीर जखमी झाले आहे. या घटनेत कारचे नुकसान झाले असून दुचाकीचा चेंदामेंदा झाला आहे.
प्राथमिक माहितीनुसार दोन्ही वाहने ही वेगाने धावत असल्यामुळे हा अपघात झाल्याचे बोलले जात आहे. स्थानिक पोलिसांनी घटनास्थळी धाव घेतली व जखमींना रुग्णालयात उपचारासाठी रवाना केले आहे. या घटनेनंतर मृतांच्या नातेवाईकांनी घटनास्थळी धाव घेतली आहे.
