‘मान्सून जागेवरच. प्रगती नाही. वातावरण मात्र अनुकूल ‘
आज वर्षातील सर्वात मोठा दिवस असुन मध्यभारतातील छत्तीसगड, झारखंड, ओरिसा, म. प्रदेशासारख्या मैदानी भागात सुरु असलेल्या उष्णतेच्या लाटेसदृश स्थिती महाराष्ट्रात केवळ विदर्भातच आपण आजपर्यन्त अनुभवत आहोत. आज व उद्यापर्यन्त (दि.२१ व २२ जून) ही लाट टिकून राहण्याची शक्यता जाणवते. परवा शुक्रवार दि.२३ जूनपासून हळूहळू ही लाट सदृश स्थिती लोप पावेल, असे वाटते. ह्या परिणामामुळे तसेच बं. उ. सागरातील आंध्र-ओरिसा कि. पट्टीवरील ३ किमी. उंचीवरील चक्रीय वाऱ्याच्या स्थितीमुळे मान्सूनची बंगाल शाखा पूर्व कि. पट्टीकडे वाटचाल करू शकते.
मान्सूनच्या बंगालच्या शाखेमुळे अरबी समुद्रात थंडावलेली मान्सूनची शाखाही उर्जीतावस्थेत येईल, असे वाटते. परंतु सुरवातीला तीचा जोर कोकणातच अधिक तर सह्याद्रीच्या पूर्वेकडील वर्षाच्छायेच्या प्रदेशात(विशेषतः नगर, पुणे सातारा ह्या जिल्ह्यात) सध्या तरी काहीसा कमी जाणवेल,असे वाटते
शुक्रवार दि.२३ जूनपासुन महाराष्ट्रात काही ठिकाणी ‘पूर्वमोसमी’ तर काही ठिकाणी ‘मोसमी’ पावसाच्या असलेल्या शक्यतेनुसार उद्या गुरुवार दि.२२ जून पासुन हळूहळू पावसासाठी वातावरणात बदल होण्याची शक्यता जाणवते. महाराष्ट्रात दि.२३, २४, २५, २६ जून (शुक्रवार ते सोमवार ) तुरळक ठिकाणी किरकोळ ते मध्यम पावसाची अपेक्षा करू या!
कोकणात पावसाचा जोर अधिक म्हणून मुंबईसह संपूर्ण कोकणातील ४ जिल्हे व गोव्यात तसेच विदर्भातही मात्र उद्यापासूनच म्हणजे गुरुवार दि.२२ जून व त्यापुढील पाच दिवस म्हणजे सोमवार दि.२६ जून पर्यन्त जोरदार ते अतिजोरदार पावसाची शक्यता जाणवते.
मध्य महाराष्ट्र व मराठवाड्यात मात्र शुक्रवार दि.२४ जूनपासुन पावसाची शक्यता जाणवते. सध्या वातावरणीय बदल एव्हढाच जाणवतो.
