नवी दिल्ली – केंद्रीय सामाजिक न्याय आणि अधिकार मंत्री थावरचंद गेहलोत यांची कर्नाटकच्या राज्यपालपदी नियुक्ती झाली आहे. त्यांच्या नियुक्तीची बातमी मिळताच मध्य प्रदेशातील नागदा या गावी ग्रामस्थांनी एकच जल्लोष केला. तीन वेळा आमदार, चार वेळा खासदार आणि २०१२ पासून आतापर्यंत राज्यसभेत खासदार राहिलेल्या गेहलोत यांचे सुरुवातीचे जीवन खूपच संघर्षमय होते. त्याविषयीच आपण आज जाणून घेणार आहोत.
मोलमजुरी ते सायकल पंक्चर काढण्याचे काम
आपल्या आयुष्याच्या सुरुवातीला गेहलोत यांनी उपजीविका भागविण्यासाठी कारखान्यात मजुरीच्या कामासह सायकल पंक्चर काढण्याचे कामे केले आहेत. त्यानंतर सक्रियता, साधेपणा आणि सहजपणा या गुणांच्या आधारे त्यांनी राजकीय कारकीर्दीचा प्रवास केला. भाजपच्या वरिष्ठ नेत्यांमधील थावरचंद गेहलोत यांचा जन्म १८ मे १९४८ रोजी नागदाजवळील रुपेटा या गावात झाला. त्यांचे आई-वडील नागदा येथे कापड उद्योगात मजुरी करत होते. गेहलोत १८ वर्षांचे झाल्यानंतर त्यांनीही कापड उद्योगात मजुरीचे काम सुरू केले. त्यादरम्यान त्यांचे शिक्षणही सुरू होते. विक्रम विद्यापीठातून पदवीचे शिक्षण घेतले. १९७० मध्ये ते भारतीय मजूर संघात सहभागी झाले. मजुरांसाठी त्यांनी अनेक आंदोलनेही केली आहेत. आंदोलनांमध्ये सक्रिय राहिल्याने त्यांची नोकरी गेली. त्यानंतर त्यांनी सायकल पंक्चर काढण्याचे दुकान सुरू केले.
राजकीय प्रवास
१९७० च्यादरम्यान थावरचंद गेहलोत यांनी जनसंघाचे नेते मांगिलाल शर्मा यांच्या संपर्कात आले आणि आंदोलनात सहभाग घेतला. एकदा ते शर्मा यांच्यासोबत निवडणुकीचे तिकीट मागण्यासाठी कुशभाऊ ठाकरे यांच्याकडे गेले. गेहलोत यांचा स्वभाव ठाकरे यांना परिचित होता. त्यांनी गेहलोत यांना आलोट या जागेवर निवडणूक लढण्यास सांगितले. गेहलोत यांच्याकडे तेव्हा उमेदवारी अर्ज दाखल करण्यासाठी २५०० रुपयेही नव्हते. तेव्हा ठाकरे यांनी त्यांची मदत केली. १९८० मध्ये गेहलोत पहिल्यांदाच आलोट येथून आमदार निवडून आले. आलोट मतदारसंघातून ते तिनदा आमदार म्हणून निवडून आले.
चार वेळा खासदार
थावरचंद गेहलोत १९९६-९७, १९९८-९९, १९९९-२००४ आणि २००४ ते २००९ पर्यंत देवास-शाजापूर लोकसभा मतदारसंघातून सलग चार वेळा निवडणूक जिंकले. त्यानंतर २०१२ पासून आतापर्यंत राज्यसभा सदस्य आहेत. त्यांच्याकडे केंद्रीय सामाजिक न्याय आणि अधिकार मंत्रालयाचा कार्यभार सोपविण्यात आला होता.
