मुंबई – आजच्या युगात ज्या व्यवसायातून मोठा नफा कमवला जाऊ शकतो असा व्यवसाय करण्याचा विचार नागरिक करत असतात. पेट्रोल पंपाचा व्यवसाय सुद्धा असाच आहे. देशात इंधनाचे दर गगनाला भिडलेले आहेत. पण सोबतच वाहनांची संख्याही वाढत चालली आहे. विनाइंधन कोणतेही वाहन धावत नाही हे तुम्हाला ठाऊक आहे. त्यामुळे अनेक लोक पेट्रोल पंपाच्या व्यवसायातून चांगलीच कमाई करत आहेत. हे पाहून अनेकांची पेट्रोल पंप उघडण्याची इच्छा जागृत झाली असेल. परंतु बोलण्यास आणि ऐकण्यास जितके सोपे वाटते तितके ते सोपे नाहीय. सर्वांना पेट्रोल पंप उघडणे शक्य होत नाही. पेट्रोल पंप उघडण्यासाठी काय करावे लागते हेच अनेकांना ठाऊक नसते. हीच माहिती आम्ही तुम्हाला सांगणार आहोत.
१) पेट्रोल पंप उघडण्यासाठी सरकारी कंपन्यांपासून ते खासगी पेट्रोलियम कंपन्या परवाने देत असतात. या कंपन्यांमध्ये इंडियन ऑइल, हिंदुस्तान पेट्रोलियम, भारत पेट्रोलियम, रिलायन्स इंडस्ट्रिज आदी कंपन्यांचा समावेश आहे.
२) पेट्रोल पंपाच्या गरजेनुसार पेट्रोलियम कंपन्या वेळोवेळी जाहिराती काढतात. कोणत्या ठिकाणी पंप उघडायचा आहे याची माहिती दिली जाते. तुमच्या विभागातील जागेत पेट्रोल पंप उघडायचा असेल तर तुम्हीसुद्धा अर्ज करू शकतात.
३) त्यासाठी अर्जदाराचे वय २१ ते ६० वर्षांच्यामधील असणे आवश्यक आहे. तसचे अर्जदार किमान दहावी उत्तीर्ण झालेला हवा. त्याशिवाय पेट्रोल पंपासाठी आवश्यक असणारी जमीन. रस्त्याच्या बाजूलाच तुमची जमीन असेल तर सोन्याहून पिवळे. जर नसेल तर तुम्ही ती भाड्यानेसुद्धा घेऊ शकतात. परंतु जमीन भाड्याने घेताना जमीन मालकांकडून ना हरकत प्रमाणपत्र (एनओसी) घेणे आवश्यक आहे. जमीन भाडेतत्वावर घेण्याचा करारही करणे आवश्यक आहे.
४) पेट्रोल पंप उघडण्यासाठी पैशांची मोठ्या प्रमाणात गरज भासते. यामध्ये १५ लाखांपासून ते ३० लाख रुपयांपर्यंत गुंतवणूक करावी लागते. जर तुमच्याकडे इतके पैसे असतील तरच पेट्रोलपंप उघडण्याचा विचार करा. अनेक जण बँकेतून कर्जही घेतात. तुम्हीही घेऊ शकतात. पण कर्जाचे हफ्त नियमित परतफेड करण्याचे नियोजन करा.
