इंडिया दर्पण ऑनलाईन डेस्क – कधी काही शेतकरी आंदोलनात नेता राहीलेली व्यक्ती आता बाबा बनून हजारोंना अध्यात्माचा मार्ग दाखवित असल्याचा फुल्ल टू फिल्मी प्रकार उत्तरप्रदेशात घडला आहे. शेतकरी नेता, अनेक गुन्हे दाखल असलेल्या या महाराजांचे नाव करौली बाबा असे आहे.
करौली बाबा यांचे मूळ नाव संतोष सिंह भदौरिया असून ते उन्नावच्या बारह सगवर येथील आहेत. उत्तर प्रदेशसह देशात महेंद्र सिंह टिकैत यांच्या नेतृत्वात शेतकरी आंदोलन गाजत होते. त्यावेळी किसान युनियन नेते संतराम सिंह यांची हत्या झाली. तेव्हा संतोष सिंह भदौरिया यांना टिकैत यांनी सरसोल परिसराची जबाबदारी दिली होती. ते शेतकरी आंदोलनात पोलिसांसोबतही भिडले होते.
संतोष सिंह भदोरिया उर्फ करौली बाबा जेव्हा कोळसा महामंडळाचे अध्यक्ष बनले त्यावेळी ते प्रसिद्धीझोतात आले. मात्र, ही प्रसिद्धी काही दिवसांसाठीच टिकलं. करौली बाबांवर अनेक गुन्हेगारी आरोप लावण्यात आले आहेत. १९९२-९५ दरम्यान त्यांच्यावर खुनासह अनेक गुन्हे दाखल आहेत. काही दिवसांपूर्वीच करौली बाबा यांच्यावर एका भक्ताने मारहाणीचा आरोप केला असून त्या घटनेचा व्हिडिओ समोर आल्याने बाबा पुन्हा प्रकाशझोतात आले आहेत.
तीन वर्षांत कोट्यवधींचे साम्राज्य
बाबांनी करौली आश्रम बांधला तेव्हा त्यांनी सर्वप्रथम शनि मंदिर बांधले. त्यानंतर त्यांनी आणखी काही जमीन खरेदी करून करौली आश्रम सुरू केला. या आश्रमात आयुर्वेदिक रुग्णालय, कामाख्या मातेचे मंदिर बांधण्यात आले. बाबांनी यूट्युबच्या माध्यमातून आपल्या तंत्र-मंत्राचा प्रचार सुरू केला. त्यांनी तीन वर्षांत कोट्यवधींचे साम्राज्य उभे केले. त्यांचा आश्रम १४ एकरांवर पसरलेला आहे.
दररोज ३ ते ४ हजार लोक आश्रमात पोहोचतात. येथे येणाऱ्या भाविकांना प्रथम १०० रुपयांची पावती फाडावी लागते. त्यानंतर तब्बल ५ हजारांपेक्षा अधिक खर्च येतो. करौली बाबा होम करण्याचा मंत्र देतात. या हवनाचा खर्च ५० हजार ते १ लाख रुपयांपर्यंत आहे.
Karoli Baba Santosh Singh Bhadoriya Life journey