जगदीशदेवरे
अफगाणिस्‍तानने कांगारुची वरात जवळ जवळ काढलीच होती. मुंबईच्‍या वानखेडेवर मिचेल स्‍टार्क ९१ वर बाद झाला तेव्‍हा ऑस्‍ट्रेलियाचे ७ गडी तंबुत परतलेले होते. सामना हातचा जातोय म्हणून कांगारुंची धडधड तर वाढली होतीच शिवाय तिकडे न्‍युझीलंड आणि पाकिस्‍तानच्‍या गोटात देखील स्‍मशान शांतता पसरली होती. परंतु, संघ जिंकल्‍याशिवाय खेळपट्टीवरून हटणार नाही अशी बाजीप्रभूंच्‍या धाटणीतली खास पराक्रमी शैली अवलंबून ग्‍लेन मॅक्‍सवेल घोडखिंडीत उतरला आणि संघ जिंकेस्‍तोवर मैदानात एकटा लढत राहीला. ७ गडी बाद झालेले असल्‍याने एरव्‍ही कमी वाटणारी २९१ ही धावसंख्‍या ऑस्ट्रेलियाला विशाळगडासारखी भव्‍य वाटायला लागली होती. अनेकांनी तर अफगाणिस्‍तान संघाच्‍या विजयाचे स्वप्न ८० टक्‍क्‍यांपर्यंत वाढवून ठेवले होते. परंतु, मॅक्‍सवेल मधला शूर योध्‍दा त्याच्या अतुलनीय पराक्रमासाठी सज्‍ज होवूनच मैदानात उतरला आणि गड जिंकून गेला.
क्रिकेटमध्‍ये काही पराक्रम हे उघड्या डोळयांनी बघायचे असतात. त्‍यांचे वर्णन एैकून ते फार तर समजतात परंतु त्‍यात गोडवा नसतो. १९८३ साली भारताने प्रुडेन्शिअल विश्‍वचषक जिंकला तेव्‍हा अशाच एका सामन्यात झिम्‍ब्‍बाव्‍वे विरुध्‍द कर्णधार कपिलदेवने महापराक्रम केला होता. कपिलचा तो डाव ध्‍वनीफितीत सुध्‍दा उपलब्‍ध नाही याचे सदैव जाणवणारे दु:ख मॅक्सवेलच्या या डावाने पुसून काढले. कपिल त्‍यावेळी अगदी असाच जिवाची बाजी लावून खेळला असेल.
मॅक्सवेलच्या पायाला क्रॅम्‍प आल्‍यानंतर अफगाण गोटात थोडी खुशी पसरली होती. त्‍याला दोन तीन जीवदाने मिळून देखील तो बाद झालेला नसल्‍याने त्याच्या “रिटायर्ड हर्ट” होण्‍याची विपक्षी संघाने आशा ठेवणे स्‍वाभाविक होते. परंतु, मॅक्‍सवेल लढवय्या आहे. त्‍याच्‍यात जिगर आहे आणि डोळ्यात महत्‍वाकांक्षा आहे. त्‍याने ही सगळी ताकद वापरात आणली आणि आजपर्यंत कुणीही बघितला नसेल असा पराक्रम साध्‍य करून दाखवला. इतक्‍या गंभीर अवस्‍थेत फलंदाजी करायची म्‍हणजे जरब लागते आणि प्रबळ मानसिकता देखील लागते. मॅक्‍सवेलने ती निर्माण केली होती. पळून धावा करण्‍यामध्‍ये धोका आहे असे जाणवल्‍यावर त्‍याने खराब बॉल निवडले आणि चौकार-षटकारांची आतषबाजी करून स्‍वत:चे विक्रमी व्दिशतक आणि संघाचा विजय साकार केला. वानखेडेवर मॅक्‍सवेल नावाचा एक क्रिकेटपटू मैदानावर उतरलेलाच नव्‍हता तर एका क्रिकेटपटूच्‍या वेशातला ऑस्ट्रेलियन सैनिक तिथे लढत होता अशा जाणिवा निर्माण करणारी ही खेळी होती. देशाभिमान जेव्‍हा जागृत होतो तेव्‍हा हे असले जगावेगळे पराक्रम बघायला मिळतात. मॅक्‍सवेलचे हे शौर्य आता एक इतिहास बनले आहे. एक असा इतिहास जो कायम स्‍मरणात राहील… ऑस्ट्रेलियन चाहत्यांच्या, अफगाणिस्तानच्या चाहत्यांच्या आणि एक त्रयस्थ म्हणून आनंद लुटणाऱ्या तुमच्या आमच्या सारख्यांच्या.
जगदीश देवरे
indiadarpanlive #WorldCupCricket #Maxwell
