नाशिक (इंडिया दर्पण वृत्तसेवा) – अन्न व औषध प्रशासनाने धडक कारवाई करत वाडीवऱ्हे येथे दोन कंटेरनमधून १ कोटी ९५ लाख ८७ हजाराचा गुटखा जप्त केला. गुप्त माहितीच्या अनुषंगे अन्न व औषध प्रशासन विभागातील अधिकारी यांनी पाठलाग करून व सापळा रचून ही कारवाई केली. गुरुनानक ढाबा परिसरात दोन मोठे कंटेनर पकडून झाडाझडती केली असता त्यात मोठ्या प्रमाणात प्रतिबंधित अन्न पदार्थांचा साठा आढळून आला.
यापैकी एका वाहनातून आरोपी पळून जाण्याचा प्रयत्न करीत असताना अधिकाऱ्यांनी फिल्मी स्टाईलने त्याचा एक किलोमीटर पर्यंत पाठलाग करून त्याच्या मुसक्या आवळल्या. वाहन क्र. RJ 06 GB 5203 या कंटेनर मधून SHK Premium या गुटक्याचा एकूण १ कोटी ५० लाख ५४ हजार रुपये किमतीचा साठा जप्त करण्यात आलेला आहे. तसेच वाहन क्र. RJ 09 GB 0472 या कंटेनर मधून SHK Premium, Safar व 4K (STAR) या ब्रँडचा एकूण ४५ लाख ३३ हजार रुपये किमतीचा साठा जप्त करण्यात आलेला आहे. अशा प्रकारे दोन्ही कंटेनर मिळून एकूण १ कोटी ९५ लाख ८७ हजार रुपयाचा प्रतिबंधित अन्न पदार्थांचा साठा व अंदाजे ३० लाख किमतीचे दोन कंटेनर अन्न औषध प्रशासनाने जप्त करून वाडीवऱ्हे पोलिसांच्या ताब्यात पुढिल कारवाईसाठी दिले आहेत. तसेच वाडीवऱ्हे पोलीस ठाण्यात भा. द. वि. कलम 328, 272,273,188 व अन्न सुरक्षा मानदे कायद्यातर्गत एफआयआरची नोंद करण्याची प्रकीया सुरू आहे. पुढिल तपास वाडीवऱ्हे पोलीस ठाणे करीत आहे. सदरची कारवाई अन्न व औषध प्रशासनाचे आयुक्त अभिमन्यू काळे, अन्न औषध प्रशासनाचे सह आयुक्त गणेश परळीकर, सहायक आयुक्त उदय लोहकरे, मनिष सानप यांचे मार्गदर्शनाखाली अन्न सुरक्षा अधिकारी गोपाल कासार व अमित रासकर यांनी केलेली आहे.
