भामरे यांनी दिलेल्या माहितीनुसार, स्थानिक गुन्हे शाखेचे पोलिस निरीक्षक हेमंत पाटील यांच्या आदेशाने सहायक पोलिस निरीक्षक मयूर भामरे, नाना शिरोळे, नामदेव खैरनार, भगवान निकम, हेमंत गिलबिले , प्रदीप बहिरम आदी देवळा पोलीस ठाणे हददीत गस्त करीत होते. त्याचवेळी त्यांना गुप्त माहिती मिळाली. त्यानुसार या पथकाने वासोळ गावातील मराठी शाळे समोरी वासोळ-मेशी रस्ता गाठला. शुक्रवारी सायंकाळी पाच वाजता याठिकाणी काही व्यक्तींजवळ तलवारी दिसून आल्या. मोटारसायकल (क्रमांक एम एच. ४१ क्यू ७५७१) वरून चालक निलेश नथूसिंग गिरासे (वय २१) व मोटारसायकलच्या पाठीमागे बसलेला परवेज शौकत शेख (वय ४०) दोघे रा. वासोळ, ता. देवळा यांच्याजवळ लोखंडी तलवारी विक्रीच्या उद्देशाने बाळगतांना रंगेहाथ पकडण्यात आले. तसेच त्यांच्याजवळ रक्कम रुपये ५८, ८०० किंमतीचा मुद्देमाल हस्तगत करण्यात आला. त्यानंतर पोलिस हवालदार भगवान निकम यांच्या फिर्यादीवरून निलेश गिरासे व परवेझ शेख तसेच त्यांना हत्यार पुरवणारा अज्ञात व्यक्तीवर देवळा पोलिसात हत्यार कायद्यांतर्गत गुन्हा दाखल करण्यात आल्याची माहिती सपोनी भामरे यांनी दिली.
