माणिकराव खुळे, हवामानतज्ज्ञ
फक्त आजपर्यन्तच महाराष्ट्रात ढगाळ वातावरणासहित तुरळक ठिकाणी किरकोळ पावसाची शक्यता आहे. महाराष्ट्रातील मुंबईसह कोकण वगळता खान्देश, नाशिक, नगर, पुणे, औरंगाबाद, जालना, बुलढाणा, अकोला, अमरावती, वर्धा, नागपूर, भंडारा, गोंदिया ह्या जिल्ह्यात आज गुरुवार दि.५ जाने. रोजी ढगाळ वातावरणासहित तुरळक ठिकाणीच किरकोळ पावसाची शक्यता जाणवते. मुंबईसह कोकण व उर्वरित महाराष्ट्रातही तरीदेखील किमान तापमान सरासरीपेक्षा काहीसे घसरलेलेच असुन थंडीचा प्रभाव कमी अधिक प्रमाणात जाणवतच आहे.
पश्चिमी झंजावाताची व्यापकता उत्तर भारताबरोबरच दक्षिण मध्य प्रदेशातील बारवणी, निमर, बेतुल, बुऱ्हाणपूर, च्छिन्दवाडा, बालाघाट पर्यन्त पोहोचली आहे. तसेच उत्तर प्रदेशातील काशी विश्वनाथ ते विदर्भातील बुलढाण्यापर्यन्त पसरलेल्या व जमिनीपासून दिड किमी उंची पर्यंतच्या हवेच्या कमी दाबाचा पट्टा तयार झाला आहे. जमिनीलगत असलेली आर्द्रता व थंड, मंद झुळूक वारा ह्या सर्व एकत्रित वातावरणीय बदलामुळे महाराष्ट्रात दोन दिवसाकरिता ढगाळ वातावरण व पाऊस हा झालेला बदल उद्यापासून निवळेल.
उद्यापासून महाराष्ट्रात पावसाची शक्यता नाही. सध्या देशाच्या भूभागावरुन जात असलेल्या पश्चिमी झंजावाताबरोबर अजून दोन पश्चिमी झंजावात येणे अपेक्षित आहेत. एका पाठोपाठ ते देशाच्या उत्तरेकडील राज्यात मार्गस्थ होवून महाराष्ट्रात थंडीचा प्रभाव टिकून ठेवतील.
तसेच पुढील काही दिवसात किमान तापमानात सध्यापेक्षा अधिक हळूहळू घसरण होवून हवेत गारवा वाढण्याची शक्यता जाणवते.
Cold Winter Forecast Weather Climate Rainfall