पुणे (इंडिया दर्पण वृत्तसेवा) – क्रांतीसुर्य महात्मा फुले आणि क्रांतीज्योती सावित्रीबाई फुले यांच्या स्मारकाच्या कामात कुठे अडचणी येऊ देणार नाही आणि अडचणी आल्याच तर मी स्वतः त्याचा पाठपुरावा करेल असे प्रतिपादन राज्याचे माजी उपमुख्यमंत्री छगन भुजबळ यांनी पुणे येथे केले. पुणे दौऱ्यावर असताना राज्याचे माजी उपमुख्यमंत्री छगन भुजबळ यांनी भिडेवाडा येथे सुरू असलेल्या स्मारकाच्या आणि फुलेवाडा येथील स्मारकाच्या विस्तारिकरणाच्या कामाचा आढावा घेतला यावेळी ते बोलत होते.
यावेळी ते म्हणाले, भिडे वाडा येथे महात्मा फुले आणि सावित्रीबाई फुले यांनी पहिली मुलींची शाळा सुरू केली. याठिकाणी स्मारक होण्यासाठी अनेक वर्ष गेली. मात्र मोठा संघर्ष उभा करून आम्ही ही लढाई जिंकली आणि त्या ठिकाणी आता स्मारक उभे राहत आहे. या स्मारकाच्या बाबतीत आढावा घेण्यासाठी आणि याच्या कामाची माहिती घेण्यासाठी आज पुण्यात आलो असल्याचे ते म्हणाले.
ते पुढे म्हणाले की, फुले वाड्याचा देखील आपण विस्तार करत आहोत महात्मा फुले राहत असलेला वाडा आणि सावित्रीबाईंचे तयार केलेले स्मारक एकत्र करून त्या ठिकाणी आपण भव्य स्मारक तयार करणार आहोत. यासाठी तिथे असलेले काही रहिवाशी आणि भाडेकरू यांच्याशी चर्चा करून हा प्रश्न लवकरच मार्गी लावणार आहोत. या ठिकाणी ५१६ मालक २०० भाडेकरू असल्याची माहिती आहे. मात्र त्यांचे योग्य ते पुनर्वसन करूनच हा प्रश्न मार्गी लावणार आहोत. विस्तारीकरणासाठी सरकारने दोन दिवसापूर्वीच निधी जाहीर केला आहे. या कामाला गती मिळाली असून या कामाचा देखील सतत आम्ही पाठपुरावा करतच राहू असेही ते म्हणाले.
यावेळी स्थानिक नागरिकांशी संवाद साधताना छगन भुजबळ म्हणाले की, स्थानिकांचा पुनर्वसनाचा प्रश्न सोडवून आपण विस्तारीकरण करणार आहोत. महापालिकेच्या वतीने स्थानिकांसाठी अनेक पर्याय उपलब्ध करून देण्यात येत आहेत. त्यामुळे महापालिकेचे अधिकारी आणि स्थानिक आमदार हेमंत रासने हे लवकरच सर्वांशी चर्चा करून यामध्ये तोडगा काढतील असा विश्वास देखील यावेळी त्यांनी व्यक्त केला.
फुले वाड्याच्या बाबतीत स्थानिक लोकप्रतिनिधी म्हणून मी स्थानिकांशी संवाद साधून लवकरात लवकर हा प्रश्न मार्गी लावून आपण फुले वाड्याचे विस्तारीकरण करू असे मत यावेळी आमदार हेमंत रासने यांनी व्यक्त केले. यावेळी दोन्ही कामे विहित वेळेत पूर्ण करावे असे आदेश देखील माजी उपमुख्यमंत्री छगन भुजबळ यांनी संबंधित अधिकाऱ्यांना दिले.
यावेळी आमदार हेमंत रासने, महापालिका आयुक्त राजेंद्र भोसले, उपायुक्त महेश पाटील, शहर अभियंता प्रशांत वाघमारे, मुख्य अभियंता युवराज देशमुख त्याचप्रमाणे समता परिषदेचे अविनाश चौरे, प्रितेश गवळी, सागर दरवडे, सपना माळी यांच्यासह अधिकारी व पदाधिकारी उपस्थित होते.
