सेवानिवृत्ताकडे २० हजाराची लाच मागणारा जाळ्यात; आरोग्य उपसंचालक कार्यालयातील प्रकार

नाशिक (इंडिया दर्पण वृत्तसेवा) – सेवानिवृत्त झालेल्या वैद्यकीय अधिकाऱ्याकडे २० हजार रुपयांची लाच मागणारा आरोग्य उपसंचालक कार्यालयातील मुख्य प्रशासकीय अधिकारी लाचलुचपत प्रतिबंधक विभागाच्या (एसीबी) जाळ्यात सापडला आहे. गजानन मारोतराव लांजेवार असे लाचखोर अधिकाऱ्याचे नाव आहे. सेवानिवृत्त झालेल्या वैद्यकीय अधिकाऱ्याकडे लांजेवार याने सेवानिवृत्तीनंतरचे रजा रोखीकरणाचे बील मंजूर करण्यासाठी २० हजाराची लाच मागितली होती. अखेर याप्रकरणी एसीबीकडे तक्रार करण्यात आली. त्यानंतर एसीबीने सापळा रचला. आरोग्य उपसंचालक कार्यालयातच लांजेवार याने २० हजार रुपयांची रक्कम घेतली. त्याचवेळी एसीबीच्या पथकाने लांजेवारला रंगेहाथ पकडले. याप्रकरणी लांजेवार विरुद्ध गुन्हा दाखल करण्याचे काम सुरू आहे.

दरम्यान, लाच देणे आणि घेणे हा गुन्हा आहे. त्यामुळे याप्रकरणी तक्रार करण्यासाठी एसीबीच्या १०६४ या टोल फ्री क्रमांकावर संपर्क साधावा, असे आवाहन करण्यात आले आहे.

Anti Corruption Raid 20 Thousand Demand Officer Booked
Nashik Deputy Health Directorate Office