इंडिया दर्पण ऑनलाईन डेस्क – पश्चिम बंगालच्या मुख्यमंत्री ममता बॅनर्जी यांच्या तृणमूल काँग्रेसच्या आणखी एका आमदाराला अंमलबजावणी संचालनालयाने (ईडी) अटक केली आहे. शिक्षक भरती घोटाळ्याचा तपास ईडीने तीव्र केला आहे. याअंतर्गतच तृणमूल काँग्रेसचे आमदार माणिक भट्टाचार्य यांना ईडीने अटक केली आहे. यापूर्वी मंत्री पार्थ चॅटर्जी यांनाही अटक करण्यात आली होती आणि त्यांच्याकडून कोट्यवधी रुपयांचा मुद्देमाल जप्त करण्यात आला होता.
माणिक भट्टाचार्य हे पश्चिम बंगाल प्राथमिक शिक्षण मंडळाचे अध्यक्ष होते. या वर्षी जूनमध्ये कोलकाता उच्च न्यायालयाच्या आदेशानुसार त्यांना पदावरून हटवण्यात आले होते. या घोटाळ्यात त्यांचा सहभाग असल्याचा आरोप होता, त्यानंतर हे प्रकरण उच्च न्यायालयात पोहोचले आणि तेथेही आदेश देण्यात आले.
या प्रकरणी ईडीने अटक केलेले माणिक भट्टाचार्य हे तृणमूलचे दुसरे आमदार आहेत. यापूर्वी पार्थ चॅटर्जी यांना जुलैमध्ये अटक करण्यात आली होती. ते तृणमूल काँग्रेसच्या ज्येष्ठ नेत्यांपैकी एक होते, पण त्यांना घेरल्यानंतर ममता बॅनर्जींनी त्यांना पक्ष आणि मंत्रिपदावरून बाहेरचा रस्ता दाखवला. पार्थ चॅटर्जींची जवळची सहकारी अर्पिता मुखर्जीच्या दोन फ्लॅटमधून ईडीने ५० कोटींहून अधिक रुपये जप्त केले होते. माणिक भट्टाचार्य यांनी सीबीआयसमोर हजर राहावे, असे आदेश कोलकाता उच्च न्यायालयाने दिले होते. याविरोधात ते सर्वोच्च न्यायालयात गेले, तेथून त्यांना दिलासा मिळाला. पुढील निर्णय होईपर्यंत कोणतीही कारवाई करू नये, असे आदेश सर्वोच्च न्यायालयाने दिले होते.
ईडीच्या एका वरिष्ठ अधिकाऱ्याने सांगितले की, भट्टाचार्य यांना न्यायालयाकडून मिळालेला दिलासा सीबीआयबाबत होता. पण ईडी ही स्वतंत्र एजन्सी आहे. या प्रकरणी ईडी स्वतंत्रपणे तपास करत असून आर्थिक व्यवहारांच्या प्रकरणांवर त्यांची स्वतःची नजर आहे. याशिवाय अन्य प्रकरणांचा तपास सीबीआय करत आहे. आज माणिक यांना ईडीच्या वतीने पीएमएलए न्यायालयात हजर करण्यात येणार आहे. या वर्षी मे महिन्यात कलकत्ता उच्च न्यायालयाने शिक्षक भरती घोटाळ्याची सीबीआय चौकशी करण्याचे आदेश दिले होते. याशिवाय या प्रकरणात ईडीचाही समावेश आहे. या प्रकरणातील पहिले आरोपपत्र ईडीने सप्टेंबरमध्ये दाखल केले होते.
Again one TMC MLA Arrest by ED Mamta Banerjee
West Bengal School Recruitment Scam