मुंबई (इंडिया दर्पण वृत्तसेवा) – अभिनेता शाहरुख खान आणि त्याच्या टीमला शुक्रवारी रात्री उशिरा मुंबई विमानतळावर कस्टम अधिकार्यांनी रोखले. महागड्या घड्याळांसाठी सुमारे ७ लाख रुपये सीमा शुल्क भरल्यानंतर त्यांना विमानतळाबाहेर जाण्याची परवानगी देण्यात आली. शाहरुख किंवा त्याच्या कंपनीकडून अद्याप कोणतीही प्रतिक्रिया आलेली नाही. शाहरुख खान, त्याची मॅनेजर पूजा ददलानी आणि टीमचे इतर सदस्य आखाती देशातील शारजाहहून परतले होते.
ते शारजाह आंतरराष्ट्रीय पुस्तक मेळ्यात सहभागी होण्यासाठी गेले होते आणि तिथे शाहरुख खानला ग्लोबल आयकॉन ऑफ सिनेमा अँड कल्चरल नॅरेटिव्ह अवॉर्डने सन्मानित करण्यात आले. शाहरुख खान शुक्रवारी रात्री साडेबारा वाजता खासगी चार्टर्ड विमानाने मुंबईला परतला. विमानतळावरून बाहेर पडताना त्याच्या सामानात अनेक रिकामे बॉक्स आढळून आले, ज्यामध्ये लक्झरी घड्याळे ठेवण्यात आली होती.
चौकशीनंतर शाहरुख खान त्याची मॅनेजर पूजा ददलानीसोबत विमानतळावरून निघून गेला, मात्र त्याचा अंगरक्षक रवी सिंह आणि टीमच्या इतर सदस्यांना थांबवण्यात आले. एअर इंटेलिजेंस युनिट (AIU) च्या सूत्रांनी दिलेल्या माहितीनुसार, शाहरुख खानकडे सुमारे १८ लाख रुपयांचे महागडे घड्याळ होते. शनिवारी सकाळपर्यंत सीमाशुल्क प्रक्रिया सुरू होती. सकाळी आठच्या सुमारास प्रक्रिया पूर्ण झाल्यानंतरच कस्टम अधिकाऱ्यांनी रवीची सुटका केली.
विमानतळावर थांबल्यानंतर सुमारे तासभर शाहरुख खानची चौकशी सुरू होती. यानंतर कस्टमने शाहरुख खानला फक्त ड्युटी भरण्यास सांगितले. ज्यासाठी त्याने होकार दिला. त्याला आणि पूजा ददलानीला विमानतळाबाहेर जाण्याची परवानगी देण्यात आली. मीडिया रिपोर्ट्सनुसार, हे बिल शाहरुखच्या बॉडीगार्डच्या नावाने बनवण्यात आले आहे. तथापि, अनेक अहवालांमध्ये दावा करण्यात आला आहे की, कस्टम ड्युटी शाहरुख खानच्या क्रेडिट कार्डद्वारे भरण्यात आली होती.
Actor Shahrukh Khan Mumbai Airport Custom Officers