नवी दिल्ली (इंडिया दर्पण वृत्तसेवा) – अंमली पदार्थांच्या विक्री, साठा आणि निर्मितीला बंदी असली तरी बिनबोभाटपणे काही ठिकाणी हा अवैध उद्योग सुरू असल्याचे वारंवार निदर्शनास येते. आताही असाच मोठा प्रकार समोर आला आहे. गुप्तचर महसूल संचालनालयाच्या (डीआरआय) अधिकाऱ्यांनी हैदराबाद येथील दोन छुप्या मेफेड्रोन निर्मिती केंद्रांवर धाडी टाकल्या. तेथील अंमली पदार्थविषयक जाळे उद्धवस्त करण्यात अधिकाऱ्यांना यश आले आहे. ही केंद्रे चालविणारा आणि त्यासाठी पैसा पुरविणारा मुख्य सूत्रधारही जेरबंद झाला आहे. त्यामुळे या प्रकरणातील मोठे रॅकेट उघड होण्याची चिन्हे आहेत.
या धाडीत डीआरआयच्या अधिकाऱ्यांनी काळ्या बाजारात ४९.७७ कोटी रुपयांची किंमत असणारे, वापरास तयार स्वरूपातील २४.८८५ किलो मेफेड्रोन, या निर्मिती प्रक्रियेसाठी आवश्यक साहित्य, मेफेड्रोन विक्रीतून मिळालेले १८.९० रुपये, महत्त्वाचा कच्चा माल, यंत्रे आणि तस्करीसाठी वापरण्यात येणारी वाहने जप्त केली.विशिष्ट गुप्तचर सूत्रांकडून मिळालेल्या माहितीच्या आधारे, डीआरआयच्या अधिकाऱ्यांनी वेगवान तसेच उत्तम प्रकारच्या समन्वयासह ही मोहीम राबविली. आणि अंमली पदार्थ निर्मिती करणारी दोन केंद्रे उध्वस्त केली. या दोन्ही ठिकाणी काम करत असलेल्या सात जणांना अटक करण्यात आली असून त्यांना न्यायालयीन कोठडी सुनावण्यात आली आहे.
तात्काळ केलेल्या पाठपुराव्यातून, ही केंद्रे चालविणारा आणि त्यासाठी पैसा पुरविणारा मुख्य मनुष्य ६० लाख रुपयांच्या रोख रकमेसह नेपाळ येथे पळून जाण्याच्या तयारीत असतानाच गोरखपूर येथून ताब्यात घेण्यात आला. अंमली पदार्थ तस्करीविषयक प्रकरणांमधील मुख्य सूत्रधार आणि कारस्थानी तसेच यासाठी पैसा पुरविणारे यांना पकडण्यावर जोर देत, केंद्रीय गृह मंत्री तसेच केंद्रीय अर्थमंत्र्यांनी दिलेल्या सूचनेनुसार ही समन्वयीत मोहीम पार पाडण्यात आली.