नवी दिल्ली – चित्रपट दिग्दर्शक अनुराग कश्यप आणि अभिनेता अनिल कपूर यांच्यात रविवारी ट्विटरवर चांगलेच वाकयुद्ध रंगले होते. त्याचे कारण आता समोर आले आहे. या दोघांच्या ‘एके v/s एके’ या चित्रपटाचा ट्रेलर प्रसिद्ध झाला आहे. तेव्हा या दोघांच्या भांडणाचे कारण सर्वांना कळले. हा चित्रपट नेटफ्लिक्स ओरिजिनल आहे. विक्रमादित्य मोटवाने यांनी याचे दिग्दर्शन केले आहे.
नेटफ्लिक्सने हा ट्रेलर शेअर करताना म्हटले आहे की, यात जे दाखवले जाईल ते सगळे खरे आहे. अनिल कपूर यात एक अभिनेता तर अनुराग कश्यप चित्रपट दिग्दर्शक म्हणून दाखवण्यात आले आहेत. प्रत्यक्ष आयुष्यातही ते या भूमिका निभावतात. अनिल कपूरच्या मुलीचे अपहरण होताना यात दाखवण्यात आले आहे. मुलीची ही भूमिका सोनम कपूरने साकारली आहे. नंतर अनिल कपूर तिला अनेक ठिकाणी शोधतात. शेवटी ते पोलिसांना विनंती करतात. पण, ते अभिनय करत असल्याचा पोलिसांचा समज होतो.
एकूणच हा ट्रेलर पाहून तर चित्रपट जबरदस्त असल्याची फिलिंग येते. याची कॉन्सेप्टही चांगली आहे. आता प्रत्यक्षात हा चित्रपट काय परिणाम साधतो, हे बघण्यात मजा येईल.
